Aktuelt frå kommunen

Kystsogeveker i Fusa

Holdhus kyrkje i Hålandsdalen sett utanfrå - Klikk for stort bilete

Dei regionale Kystsogevekene er i full gang. Søndag 26. august er det Torgdag på Engevik gaard og konsert i Holdhus kyrkje. Laurdag 8. september er det Familedag på Nore Fusa skule og onsdag 12. september kan ein oppleva programmet Migrasong i Strandvik grendahus.

Torgdagen på Engevik gaard er i tidsrommet kl 13-17 med gratis inngang. Her vert det sal av lokal mat, lokalt handverk, kunstutstilling og open restaurant. Du får høve til å sjå deg om i det særprega tunet som var ein millitær sjefsgard på 1700-talet.

Kvilestein i Holdhus kyrkje

Same dag er det konsert i Holdhus kyrkje kl 17 med programmet Kvilestein der ein får eit møte med folkesongen og folkemusikken i Hordaland. Dei som medverkar er songaren Kjersti Wiik, Einar Mjølsnes på feler og Laila Kolve på fløyter. Konserten er lågmælt og vakker. Balsam for sjela – eller som ein kvilesten i ein travel kvardag. Inngang kr 300,- og det skal vera råd å betala med vipps. Arrangør er Fortidsminneforeningen Fusa lokallag.

Samhald 100 år

Laurdag 8. september er det Familedag på Nore Fusa skule i samband med ungdomslaget Samhald sitt 100-årsjubileum. Det blir leikar, konkurransar og aktivietetar for heile familien frå kl 12. Om vèret er lagleg vert det grilling ute.

Migrasong - tonane dei bar med seg over havet

Onsdag 12. september er det fokus på utvandringa til Amerika med programmet Migrasong. Her får du eit møte med menneskeskjebnar i ord og bilete og musikken dei tok med seg over havet. Folkesongar og Fusa-ven Reidun Horvei er sentral i Migraong og ho har med seg gitarist Øyvind Lyslo og Per Inge Hove på trøorgel. Koret "Takt og tone" er teknisk arrangør i samarbeid med Hordaland fylkeskommune og Fusa kommune.

Publisert av Erik Vangsnes. Sist endra 21.08.2018
Fusa kommune
Kommunetunet, Leiro 31 Postboks 24
5649 Eikelandsosen
Telefon
: 56 58 01 00

Faks
: 56 58 01 02
Org.nr.
: 964 968 896
Kommunenr.
: 1241
Opningstid
: 09.00-14.30