Fusa har mykje å by på på innan natur og friluftsliv. Fusa kommune er medlem i Bergen og omland friluftsråd og vil i samarbeid med friluftsrådet freista å leggja tilhøva betre tilrette for friluftsliv i åra som kjem. Nokre få stader har ein lagt særskilt tilrette ved sikring av areal. Generellt er likevel ålmenta sin tilgang til utmarka både på land og ved sjø sikra gjenom friluftslova.
Fusa har ein svært variert natur frå havstrand til høgfjell. Fleire stader kan du ta deg lette småturar, t.d. på jakt etter jettegryter langs Koldalselva i Eikelandsosen eller i fotefara til husmannsfolket på Vinnesholmen. I naturreservatet på Vinnesleiro er det ein natursti med informasjonsskilt om fuglelivet.
Kommunen har store fjellområde. I alle deler av kommunen er det flott og variert turterreng. Sidan Fusa ligg i det frodige og opne fjordlandskapet får du flotte utsyn frå fjella i kommunen sjølv ned på mindre toppar kring 400 meter. Fusa kan også by på høgfjell og toppar over 1000 meter. Graden av tilrettelegging er varierande. Nokre plasser er det lett å finna parkering, andre stader er det ei føremon å vera lokalkjend. Somme stiar er merka. Det er eit godt kart over Hålandsdalen som ein kan få kjøpt i ekspedisjonen i Kommunetunet.
Fusa er også ein flott stad å ta seg fram på sykkel. Frå lett og fint terreng på Fusa-halvøya til meir utfordrande natur i Hålandsdalen. Du kan t.d. sykla ein lengre rundtur frå Kilen mot Sævareid, gjennom Baldersehim, Nordtveit og Sundfjord og langs Hardangerfjorden tilbake til Mundheim og Mundheimsdalen.
 Padling er blitt svært populært. I sjø kan du finna smule farvatn og eit eldorado for padlarar t.d. i områda kring Holmefjord eller Lygrepollen. Du kan også padla i innlandsvatn, men merk deg at det er restriksjonar på slik ferdsel med pålegg om desinfisering av utstyr for å unngå spreiing av fiskesjukdommar. Det står informasjon om dette fleire stader langs vassdraget og det er også sett ut desinfiseringsmiddel.
Fusa har hatt eit av det beste fiskevatna i landet. Skogseidvatnet har vore viden kjend m.a. for stor røye og regnebogeaure. Mange leiger seg hytter langs vassdraget og legg fiskeferien til Fusa. Vinterstid har det også vore populært med isfiske her. Når det gjeld fiske i vatna vil det liggja informasjon om kjøpa av fiskekort, overnatting m.m. under turistinformasjon.
Bilvandring er også blitt populært. Med t.d. Bergen som utgangspunkt kan du inkludera Fusa i ulike rundturar i Hordaland. Du finn informasjon og ulike turforslag her.
Båtturistar har også mange fine hamner i Fusa. Mange tek turen til Trætteskjeret i Lygrepollen. Ved Vinnesholmen kan du finna gjesteplasser i Vinnes båtlag sin marina. For dei badande er det to offentlege friluftsområde; Hagafjøra i Eikelandsosen og Vinnesholmen på Vinnes. I tillegg er det mange fine badefjører kringom i bygdene. | 
